സ്വന്തം ലേഖകന്‍: ദുബായ് തീരത്ത് മുട്ടയിടാന്‍ ഹോക്‌സ്ബില്‍ കടലാമകളുടെ തിക്കും തിരക്കും; അപൂര്‍വ കാഴ്ച കാണാന്‍ കാഴ്ചക്കാരുടെ തിരക്ക്. തീരത്ത് കൂട്ടത്തോടെ മുട്ടയിടാന്‍ ഹോക്‌സ്ബില്‍ കടലാമകള്‍ എത്തി. സെപ്റ്റംബര്‍ വരെ ഇതുതുടരും. അത്യപൂര്‍വമായ ഈ കടലാമകളുടെ പ്രിയപ്പെട്ട താവളമാണ് ദുബൈ തീരം. മുട്ടകള്‍ വിരിഞ്ഞു കുഞ്ഞുങ്ങള്‍ പുറത്തിറങ്ങാന്‍ 50 മുതല്‍ 60 ദിവസം വരെയെടുക്കും. വിരിഞ്ഞിറങ്ങുന്ന കുഞ്ഞുങ്ങള്‍ മണ്ണില്‍ നിന്നു പുറത്തുവന്ന് കടലിലേക്കു നീങ്ങുന്നു.
മണിക്കൂറുകളോളം തുടര്‍ച്ചയായി തുഴയാന്‍ ഇവയ്ക്കാകും. ആമകള്‍ക്കും മുട്ടകള്‍ക്കും സുരക്ഷയൊരുക്കാന്‍ ദുബൈയില്‍ വിപുലമായ ക്രമീകരണങ്ങള്‍ ഏര്‍പ്പെടുത്തിയിട്ടുണ്ട്. ആമകള്‍ കൂട്ടത്തോടെ എത്തുന്നതും നൂറുകണക്കിനു കുഞ്ഞുങ്ങളുമായി മടങ്ങുന്നതും കൗതുകകരമായ കാഴ്ചയാണ്.
വലിയ തുഴ പോലുള്ള കൈകളും കട്ടിയുള്ള പുറംതോടും അല്‍പം പരന്ന ശരീരവുമുള്ള ഇവയുടെ സംരക്ഷണത്തിന് ദേശീയ കര്‍മപരിപാടികള്‍ക്ക് യുഎഇ തുടക്കം കുറിച്ചിട്ടുണ്ട്. മുട്ടയിട്ടു വിരിഞ്ഞു മടങ്ങുന്നതുവരെയുള്ള കാലം അധികൃതരുടെ സൂക്ഷ്മനിരീക്ഷണത്തിലായിരിക്കും.ആമകളുടെ താവളത്തിലേക്ക് ആരും അതിക്രമിച്ചു കയറാതിരിക്കാന്‍ മുന്നറിയിപ്പു ബോര്‍ഡുകള്‍ സ്ഥാപിക്കുകയും സന്ദര്‍ശകര്‍ക്കു ബോധവല്‍ക്കരണം നടത്തുകയും ചെയ്യും.
ബീച്ചിനു സമീപം നിര്‍മാണപ്രവര്‍ത്തനങ്ങള്‍ അനുവദിക്കില്ല. മണല്‍ കൊണ്ട് പ്രത്യേകരീതിയില്‍ അതിരുകള്‍ തിരിച്ച് ആമകള്‍ക്കു സുരക്ഷിതമേഖലയൊരുക്കുന്നു. സന്ദര്‍ശകരെ ഇവിടേക്കു കടത്തിവിടില്ല. ലോകത്ത് ഏഴിനം കടലാമകള്‍ ഉള്ളതില്‍ വംശനാശം സംഭവിക്കുന്നവയാണ് ഹോക്‌സ്ബില്‍, ഗ്രീന്‍ ഇനങ്ങള്‍. എന്നാല്‍ ഇവ രണ്ടും യുഎഇ തീരങ്ങളിലെത്താറുണ്ട്. മനുഷ്യരും മൃഗങ്ങളും കടലാമകള്‍ക്ക് വന്‍ഭീഷണിയാണ്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല